Na osnovu raspoloživih podataka, za 2019. realni rast je procijenjen na 3,1 odsto, dok projektovana prosječna stopa rasta BDP-a, u periodu 2020-2022 iznosi tri odsto, ističe se u Smjernicama makroekonomske i fiskalne politike za period od 2019. do 2022. godine koje je pripremilo Ministarstvo finansija.

“Crnogorska ekonomija će u 2020. zabilježiti rast od 3,0%, 2,7% u 2021. godini i 3,2% u 2022. Glavna pretpostavka scenarija je da će bruto investicije zadržati visok nivo od oko 1,6 milijardu eura. U 2020. se završava prioritetna dionica autoputa (pretpostavka scenarija) i počinje operativna faza funkcionisanja tog projekta, što će proizvesti pozitivne efekte na ekonomski ambijent i ubrzati ekonomski rast u narednim godinama. Istovremeno, završetak autoputa smanjuje investicije iz javnih izvora (kapitalni budžet), ali će ovo smanjenje nadomjestiti rast investicija iz privatnih izvora, sa nivoa od 21,5% na oko 24% BDP-a, podstaknuto očekivanim rastom investicija po osnovu ekonomskog državljanstva, modernizacije aerodroma i ostalim najavljenim investicijama, naglašava se u smjernicama. 

Takođe, očekuje se da će planirano donošenje Zakona o javno-privatnom partnerstvu biti u funkciji daljeg rasta investicija i njihove veće diversifikacije. 

“U periodu 2019. do 2022. kumulativni nominalni rast BDP-a će iznositi 18,1 odsto, dok će realan rast iznositi 12,6 odsto”, precizirano je u dokumentu. 

U dokumentu koji je Vlada usvojila početkom avgusta navedeni su i sublimirani ciljevi ekonomske politike u periodu 2019.-2022. godine. 

1. BDP, u nominalnim iznosima, prosječno godišnje će rasti po stopi od oko 4,2%, a realno po stopi od oko 3,0%;

2. Zaposlenost će prosječno godišnje rasti za oko 1,5%;

3. Smanjenje stope nezaposlenosti sa 14,7% u 2019. na 13,7% u 2022. godini;

4. Smanjenje deficita tekućeg računa, sa 17,5% BDP-a u 2019, na 10,3% u 2022. godini;

5. Kao rezultat povećanja prihoda na jednoj, odnosno smanjenja javne potrošnje na drugoj strani, deficit javnih finansija nakon 2019. godine prelazi u zonu suficita koji se ostvaruje u svim godinama projekcije (2020 – 2022. godine);

6. Ostvarivanje suficita javnih finansija smanjuje potrebu za finansiranjem, odnosno omogućava prijevremenu otplatu postojećeg duga;

7. Javni dug postepeno opada i kreće se u rasponu od 79,0% BDP-a u 2019. godine do nivoa od 59,2% BDP-a u 2022. godini;

8. Od 2022. godine, glavni fiskalni agregati (deficit i javni dug) nalaze se u okvirima propisanim kriterijumima iz Mastrihta.