Fenomenalna atmosfera kao i uvijek na kultnom Vestfalenu i sjajan fudbal iako se na kraju samo jednom tresla mreža – Borusija Dormund je za gol bliža velikom finalu i “Vembliju”.

Njemački tim je golom Niklasa Filkruga sa 1:0 savladao Pari Sen Žermen u prvom meču polufinala Lige šampiona.

Gol koji će mnogo značiti momcima Edina Terzića Filkrug je postigao u 36. minutu kada je majstorski završio akciju nakon sjajne duge lopte Nika Šloterbeka.

PSŽ nije blistao u prvom poluvremenu, ali je u drugom imao nekoliko velikih šansi – Kilijan Mbape i Ašraf Hakimi su pogodili stativu u istom napadu, a neprecizni su bili i Fabijan Ruiz i Usman Dembele.

Nije se branila ni Borusija, sjajno su vukli Sančo i Adejemi, pa je njemački klub mogao i do ubjedljivije pobjede, ali su odlične prilike propustili Filkrug i Brandt.

Borusija ima prednost, ali sve će se rješavati u Parizu za šest dana.