Još jedna utakmica puna golova i preokreta odigrana je danas na SP u Kataru – Gana je savladala Južnu Koreju sa 3:2.

Selekcija iz Azije bolje je počela utakmicu, napadala, ali su Ganjani bili konkretniji.

Salisu je u gužvi pred golom Koreje bio spretan u 24. minutu, a Kudus odlično reagovao poslije centaršuta Ajua, 10 minuta kasnije.

Međutim, nakon odmora su bolje koristili šanse fudbaleri Južne Koreje.

Čo je u 58. i 61. minutu, oba puta iz blizine pogađao mrežu Gane i vratio stvari na početak.

Kada se očekivalo da krunišu inicijativu i preokrenu, stigao je neočekivani odgovor Ganjana.

Opet je na pravom mjestu bio sjajni Mohamed Kudus za veliku pobjedu Gane.

Afrička reprezentacija sada ima tri boda, Južna Koreja je ostala na bodu, ali još nije eliminisana.

Kalkulacije pred posljednje kolo biće poznate poslije večerašnjeg meča u ovoj grupi između Urugvaja i Portugala, koji će početi u 20 sati.